Bid-devozzjoni u ġieħ li nuru lejn ix-xbieha tas-salib imqaddes niġu wiċċ imb wiċċ mal-Mulej u Salvatur, li hu l‑Aħbar it‑Tajba, l‑Imħabba, il‑Ħniena u t‑Tama tagħna. Hu mument fejn nagħrfu l‑kobor tiegħu, ninxteħtu quddiemu hekk kif aħna; b’dak kollu li jtaqqal u jferraħ il‑ħajja tagħna. Dan hu mument, anzi hi attitudni fejn ninxteħtu f’riġlejh, biex qalbna tikkonverti (iddur lejh). Hu, li jafna aktar milli nafu lilna nfusna, jistedinna biex ninfetħu ktieb quddiemu biex jgħinna naqraw il‑paġni ta’ ħajjitna, dawk passati u dawk preżenti, biex flimkien miegħu nimxu ’l quddiem.
Alla, fil‑ħniena tiegħu, iżommna minn idejna b’ġentilezza ta’ omm biex iqajjimna meta naqgħu u jixħet raġġ ta’ dawl meta s‑swidija titkebbeb madwarna. Hu dejjem viċin tagħna imma l‑ħarsa tagħna jaf tkun qed tinjora l‑preżenza tiegħu, il‑qalb tagħna tant tkun mimlija sa ruħ ommha b’elf ħaġa li ma jkunx hemm spazju għalih.
Ix-xbieha ta’ Ġesù msallab tgħinna niffissaw il‑ħarsa tagħna fuqu u hu lura fuqna, għajnejna jħarsu f’għajnejh, qalbna tħabbat ma’ tiegħu u mill‑ġdid, fis‑skiet, inħallu spazju għalih biex iqalleb il‑paġni koroh u sbieħ ta’ ħajjitna.
Hawn jien, Mulej. Quddiemek insib is‑serħan tiegħi; fil‑preżenza tiegħek insib il‑fejqan mill‑weġgħat u l‑ġrieħi tiegħi. Int taf tajjeb dak li ngħaddi minnu; int miegħi meta nsofri, maġenbni meta l‑weġgħat tiegħi jinfdu qalbi. Meta saqajja jogħtru int hemm biex treġini; int viċin tiegħi u tgħannaqni anke fil‑mumenti li fihom ma narax ħlief dlam, li jtaqqal il‑ħarsa tiegħi. Bħax‑xemx matul il‑lejl, int iżżomm kelmtek li tibqa’ magħna dejjem.
Ieqaf, iskot, agħraf lill‑Mulej (ara Salm 46, 10). Waqt dan il‑mument ta’ silenzju, ħalli l‑Kelma ta’ Alla tmexxik.
Il‑ħdax‑il dixxiplu telqu lejn il‑Galilija u marru fuq il‑muntanja fejn kien ordnalhom Ġesù. Kif rawh, inxteħtu quddiemu, għalkemm xi wħud iddubitaw. Ġesù resaq ikellimhom u qalilhom: “Lili ngħatat kull setgħa fis‑sema u fl‑art. Morru, mela, agħmlu dixxipli mill‑ġnus kollha, u għammduhom fl‑isem tal‑Missier u tal‑Iben u tal‑Ispirtu s‑Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sal‑aħħar taż‑żmien.”
Infaħħruk, Mulej, għax int tibqa’ magħna dejjem. Il‑preżenza tal‑Mulej fostna mhix biss biex aħna ngawduh weħidna. Alla tagħna hu Alla personali mhux individwali. Il‑Mulej ma jsejħilniex biex nibqgħu qaqoċċa madwaru. Hu jsejħilna lejh biex, wara li nieqfu ftit miegħu, noħorġu u nwasslu lilu kull fejn inkunu. Isejħilna biex minnu nixorbu l‑benna ta’ mħabbtu u nwassluha lill-oħrajn.
Din l‑imħabba hi l‑għajn tal‑fejqan tagħna; minnha tiġina l‑forza sabiex nerġgħu nqumu fuq saqajna u nibdew il‑mixja lejn il‑fejqan. Mill‑preżenza ta’ Ġesù fostna ser nixorbu l‑mediċina li neħtieġu. Il‑feriti u l‑weġgħat f’ħajjitna ma jonqsux. Dawn jistgħu jkunu ktajjen u ballal ma’ saqajna li ma nistgħux ninħelsu minnhom; li jsammruna mas‑salib.
Din l‑imħabba mhux dejjem irċevejnieha u mhux dejjem wassalnieha. Dan l‑att u attitudni ta’ ġieħ u devozzjoni lejn ix-xbieha ta’ Kristu Msallab għandu jwassalna, jew tal‑anqas jiftaħ il‑qalb tagħna, biex għajnejna jaraw dawk ir‑realtajiet madwarna fejn hemm il‑weġgħat u l-feriti u fejn stajna konna ta’ ostaklu sabiex tasal l‑imħabba ta’ Alla.
Il‑feriti u l‑weġgħat tal‑oħrajn qegħdin fuqna wkoll; jaffettwawna b’mod negattiv u jistgħu jsiru l‑feriti tagħna stess.
Aħseb f’kemm persuni setgħu kienu vittma ta’ rappreżentanti tal‑Knisja; kemm strutturi ħolqu weġgħat; kemm firdiet bejn il‑membri tal‑Knisja; kemm nies ħassewhom miċħuda mill‑Knisja ommhom; kemm nies iħossuhom mifruda mill‑Knisja, barranin f’darhom stess, minħabba s‑sitwazzjoni personali, jew l‑orjentament sesswali tagħhom.
Saqsi: jien stajt kont kaġun tagħhom? Jien stajt mingħajr ma naf komplejt din l‑attitudni? Jien stajt rajt u skitt minħabba l‑biża’ jew għax qabilli?
Aħseb f’kemm relazzjonijiet fil‑familji, bejn il‑koppji, bejn l‑aħwa, setgħu kienu valenużi, kemm relazzjonijiet intimi ma kinux frott l‑imħabba u saħansitra kienu abbużivi. Kemm nies sofrew abbużi sesswali, abbużi psikoloġiċi, abbużi finanzjarji fi ħdan il‑familja stess.
Saqsi: jien stajt kont kaġun tagħhom? Jien stajt mingħajr ma naf komplejt din l‑attitudni? Jien stajt rajt u skitt minħabba l‑biża’ jew għax qabilli?
Aħseb f’kemm stajna konna irresponsabbli lejn l-ambjent ta’ madwarna. Kemm ma tajniex każ dak li kien qed jiġri madwarna u forsi ma ħadniex passi biex intejbu l‑ambjent li ngħixu fih.
Saqsi: jien stajt kont kaġun tagħhom? Jien stajt mingħajr ma naf komplejt din l‑attitudni? Jien stajt rajt u skitt minħabba l‑biża’ jew għax qabilli?
Aħseb kemm teżisti attitudni negattiva lejn gruppi differenti ta’ nies, ta’ etniċità differenti, ta’ gruppi differenti fil‑Knisja, ta’ każini differenti. Kemm tajn fuq ħaddieħor, informazzjoni ħażina, informazzjoni qarrieqa minħabba n‑nuqqas ta’ ħsieb jew agħar minn hekk b’irresponsabbiltà.
Saqsi: jien stajt kont kaġun tagħhom? Jien stajt mingħajr ma naf komplejt din l‑attitudni? Jien stajt rajt u skitt minħabba l‑biża’ jew għax qabilli?
Il‑preżenza tal‑Mulej tfejjaq u ssalva. Agħżel silta minn dawn u itlob lill-Mulej ifejjaq il‑qalb tiegħek; dawwar ħarstek lejh, iftaħ widnejk għall‑kliem tiegħu mimli ħlewwa, intelaq kif int fi ħdanu u nxteħet f’riġlejh b’ġest ta’ mħabba.
Jien għalaqt widnejjja?
Mk 7, 31-37
Jien għalaqt għajnejja?
Mt 20, 29‑34;
Mk 8, 22‑26;
Lk 18, 35‑43;
Jn 9, 1‑12
Jien tqil biex nieħu azzjoni?
Mt 9, 1‑8;
Mt 12, 9‑13;
Mk 2, 1‑12;
Lk 5, 17‑26;
Jn 5, 1‑18
Kliemi jew l‑azzjoni tiegħei ikkontaminaw l‑ambjent ta’ madwari?
Mt 8, 1‑4;
Mk 1, 40‑45;
Lk 5, 12‑16;
Lk 17, 11‑19
Il‑Mulej jafek aktar milli taf lilek innifsek. Ikkonkludi dan il‑mument ta’ riflessjoni billi tintelaq f’riġlejh fit-talba ta’ Salm 138.
Mulej, int tgħarbilni u tagħrafni;
int taf meta noqgħod u meta nqum,
int tagħraf mill‑bogħod ħsibijieti.
Int tagħraf il‑mixi u l‑waqfien tiegħi;
triqati kollha inti tafhom sewwa.
Inkun għadni anqas lissint il‑kelma,
meta int, Mulej, tkun ġa tafha kollha.
Dawramejt inti tħaddanni,
u tqegħedli idek fuqi.
L‑għerf tiegħek tal‑għaġeb,
ma nwassalx għalih;
għoli wisq, ma nlaħħaqx miegħu.
Fejn immur ’il bogħod mill‑ispirtu tiegħek?
Jew fejn nista’ naħrab minn quddiem wiċċek?
Jekk nitla’ fis‑smewwiet, hemm int;
jekk nimtedd f’qiegħ l‑art, int hemm ukoll.
Jekk nilbes il‑ġwienaħ tas‑sebħ,
u mmur ngħammar fi truf il‑baħar,
hemm ukoll tilħaqni idek,
u taqbadni l‑leminija tiegħek.
Jekk ngħid: “Ħa jaħbini d‑dlam,
ħa jkunli d‑dawl lejl madwari,”
anqas id‑dlam ma hu mudlam;
għalik il‑lejl jiddi bħan‑nhar;
id‑dlam bħad‑dawl għalik.
Għax int sawwart
il‑ġewwieni tiegħi,
u f’ġuf ommi inti nsiġtni.
Inroddlok ħajr, għax
tal‑għaġeb għamiltni:
tal‑għaġeb huma
l‑għemejjel tiegħek.
U ’l ruħi inti tafha tajjeb.
